امیرِ جماعتِ اسلامی حافظ نعیم الرحمٰن نے حکومت کی جانب سے پیٹرولیم مصنوعات کی قیمتوں میں معمولی کمی کے اعلان کو عوام دشمن فیصلہ قرار دیتے ہوئے اسے مسترد کر دیا۔
اپنے بیان میں حافظ نعیم الرحمٰن نے کہا کہ عالمی مارکیٹ میں تیل کی قیمتیں جنگ سے پہلے کی سطح پر آ چکی ہیں، اس کے باوجود حکومت نے پیٹرول اور ڈیزل کی قیمت میں صرف ایک روپے 97 پیسے فی لیٹر کمی کر کے عوام کو حقیقی ریلیف دینے سے گریز کیا ہے۔
انہوں نے حکومت پر عوام کے حق پر ڈاکا ڈالنے کا الزام عائد کرتے ہوئے اعلان کیا کہ جماعتِ اسلامی آئندہ 48 گھنٹوں کے دوران پیٹرولیم قیمتوں میں خاطر خواہ کمی کے مطالبے کے لیے ملک گیر احتجاجی مظاہروں کا اعلان کرے گی۔