محکمہ موسمیات نے آئندہ 24 گھنٹوں کے دوران شہر میں تیز ہوائیں چلنے اور مختلف علاقوں میں ہلکی بوندا باندی کا امکان ظاہر کیا ہے۔ محکمہ کے مطابق اس دوران مطلع جزوی طور پر ابر آلود رہے گا جبکہ موسم مرطوب رہنے کی توقع ہے۔
محکمہ موسمیات کے مطابق کراچی میں زیادہ سے زیادہ درجہ حرارت 33 سے 35 ڈگری سینٹی گریڈ کے درمیان رہنے کا امکان ہے، جبکہ گزشتہ 24 گھنٹوں کے دوران کم سے کم درجہ حرارت 28.5 ڈگری سینٹی گریڈ ریکارڈ کیا گیا۔
رپورٹ کے مطابق ہوا میں نمی کا تناسب 78 فیصد ہے، جبکہ سمندر کی جانب سے 18 کلومیٹر فی گھنٹہ کی رفتار سے ہوائیں چل رہی ہیں، جس کے باعث گرمی کی شدت میں کچھ کمی محسوس کی جا سکتی ہے۔
محکمہ موسمیات نے شہریوں کو غیر ضروری سفر کے دوران احتیاط برتنے، بارش کی صورت میں محفوظ مقامات پر رہنے اور موسم کی تازہ ترین صورتحال سے آگاہ رہنے کی ہدایت کی ہے۔