پاکستان تحریک انصاف کے بانی رہنما اکبر ایس بابر نے پارٹی کے بانی اور دیرینہ کارکنوں سے رابطہ مہم شروع کرنے کا اعلان کرتے ہوئے آئندہ کے لائحہ عمل کے لیے مشاورت کا آغاز کر دیا ہے۔
ذرائع کے مطابق اکبر ایس بابر پارٹی کے بانی اراکین امین ذکی، رانا سہیل، رانا جلیل اور حنیف راجپوت سمیت دیگر رہنماؤں کا اجلاس بلانے کے لیے بھی متحرک ہو گئے ہیں، جس میں پارٹی کی موجودہ صورتحال اور مستقبل کی حکمت عملی پر غور کیا جائے گا۔
اکبر ایس بابر نے اپنے بیان میں کہا کہ پاکستان تحریک انصاف کا قیام ملک کو سیاسی اور دیگر قبضہ مافیا سے نجات دلانے کے مقصد سے عمل میں آیا تھا، تاہم ان کے بقول آج پارٹی خود سیاسی قبضہ مافیا کی گرفت میں آ چکی ہے۔
انہوں نے کہا کہ پارٹی کے مخلص، نظریاتی اور بانی کارکنوں کو ایک پلیٹ فارم پر جمع کرنے کی ضرورت ہے تاکہ تحریک انصاف کو اس کے بنیادی نظریات اور مقاصد کے مطابق آگے بڑھایا جا سکے۔