اسلام آباد میں کشمیر چوک انڈر پاس منصوبے کا باقاعدہ افتتاح کر دیا گیا۔ وزیراعظم شہباز شریف نے افتتاحی تقریب سے خطاب کرتے ہوئے منصوبے کی ریکارڈ مدت میں تکمیل پر وفاقی وزیر داخلہ محسن نقوی اور ان کی ٹیم کی کارکردگی کو سراہا۔
وزیراعظم شہباز شریف نے کہا کہ ان کے پورے سیاسی کیریئر میں اتنی مختصر مدت میں کوئی میگا پراجیکٹ مکمل نہیں ہوا، جس تیزی سے کشمیر چوک انڈر پاس منصوبہ پایہ تکمیل تک پہنچا ہے۔ انہوں نے کہا کہ صرف 27 روز میں انڈر پاس، ملحقہ سڑکوں کی تعمیر کے ساتھ بڑی تعداد میں درخت اور پودے بھی لگائے گئے ہیں۔
شہباز شریف نے منصوبے میں شفافیت کو بھی قابلِ تحسین قرار دیتے ہوئے کہا کہ کشمیر چوک انڈر پاس کا ٹھیکا شفاف طریقہ کار کے تحت ای پی اے ڈی (e-PAD) کے ذریعے دیا گیا، جبکہ منصوبہ مقررہ تخمینے سے بھی کم لاگت میں مکمل کیا گیا۔
وزیراعظم نے کہا کہ وفاقی دارالحکومت میں ترقیاتی منصوبوں کا سلسلہ جاری ہے اور اگلے سال شنگھائی تعاون تنظیم (SCO) کے اجلاس سے قبل اسلام آباد میں مزید شاندار منصوبے مکمل کیے جائیں گے۔
انہوں نے وفاقی وزیر داخلہ محسن نقوی کو مخاطب کرتے ہوئے کہا کہ اسلام آباد کو پھولوں سے سجا دیں تاکہ وفاقی دارالحکومت آنے والے مہمان اور شہری پھولوں کی خوشبو اور خوبصورتی سے لطف اندوز ہوسکیں۔