پاکستان پیپلز پارٹی کے چیئرمین بلاول بھٹو زرداری نے کہا ہے کہ افواجِ پاکستان ملک کی ”ریڈ لائن“ ہیں اور کسی کو بھی فوج یا اس کے اہلکاروں کے خلاف بیان بازی نہیں کرنی چاہیے۔
ایک تقریب سے خطاب کرتے ہوئے بلاول بھٹو زرداری نے کہا کہ پاکستان کے دشمن ملک کے اندرونی اختلافات سے فائدہ اٹھانے کے مواقع تلاش کر رہے ہیں، اس لیے سیاسی رہنماؤں، کارکنوں اور پالیسی سازوں کو ذمہ داری کا مظاہرہ کرتے ہوئے محتاط انداز میں گفتگو کرنی چاہیے۔
انہوں نے کہا کہ بھارتی وزیراعظم نریندر مودی سندھ طاس معاہدے کو سیاسی ہتھیار کے طور پر استعمال کر رہے ہیں، تاہم پاکستان نہ دباؤ میں آئے گا اور نہ ہی کسی قسم کی بلیک میلنگ قبول کرے گا۔
کراچی کی سیاسی صورتحال کا حوالہ دیتے ہوئے بلاول بھٹو زرداری نے کہا کہ وہ 1990 کی دہائی کی سیاست کی واپسی نہیں چاہتے۔ انہوں نے الزام عائد کیا کہ متحدہ قومی موومنٹ (ایم کیو ایم) کے بانی کی سیاست نے کراچی کے عوام کو مشکلات سے دوچار کیا۔
بلاول بھٹو زرداری نے اس عزم کا اظہار کیا کہ پاکستان کے قومی مفادات، ریاستی اداروں اور عوام کے اتحاد کے تحفظ کے لیے تمام سیاسی قوتوں کو ذمہ دارانہ کردار ادا کرنا ہوگا۔