وادیٔ کاغان میں مسلسل بارشوں کے باعث سہوچ کے مقام پر شدید لینڈ سلائیڈنگ کے نتیجے میں ناران۔خجل کھڈ روڈ ہر قسم کی ٹریفک کے لیے بند کردی گئی، جس سے علاقے میں آمدورفت معطل ہوگئی۔
کاغان ڈیولپمنٹ اتھارٹی (KDA) کے مطابق برساتی نالے میں طغیانی اور بھاری لینڈ سلائیڈنگ کے باعث سڑک کو شدید نقصان پہنچا، جس کے پیش نظر عوام کی حفاظت کے لیے ٹریفک عارضی طور پر روک دی گئی ہے۔
انتظامیہ کا کہنا ہے کہ سڑک کی بحالی اور ملبہ ہٹانے کے لیے فوری طور پر بھاری مشینری متاثرہ مقام کی جانب روانہ کردی گئی ہے، جبکہ بحالی کا کام جلد شروع کیا جائے گا تاکہ ٹریفک کی روانی بحال کی جاسکے۔
دوسری جانب ضلعی انتظامیہ کے مطابق کاغان کے علاقے سیری نالہ میں ایک بار پھر طغیانی آئی ہے، جس کے باعث ہونے والے نقصانات کا تخمینہ لگایا جا رہا ہے۔ حکام نے سیاحوں اور مقامی افراد سے اپیل کی ہے کہ وہ غیر ضروری سفر سے گریز کریں اور انتظامیہ کی جانب سے جاری کردہ ہدایات پر عمل کریں۔