پاکستان پیپلزپارٹی کے چیئرمین بلاول بھٹو زرداری نے ایک ویڈیو پیغام کے ذریعے سوشل میڈیا پر اپنی منگنی اور شادی سے متعلق گردش کرنے والی تمام خبروں اور افواہوں کو سختی سے مسترد کردیا ہے۔
انہوں نے اپنے پیغام میں وضاحت کی کہ سوشل میڈیا پر نہ صرف ان کی بات پکی کروائی گئی بلکہ منگنی اور شادی کا دعویٰ بھی کردیا گیا، حالانکہ حقیقت میں ایسا کچھ نہیں ہوا۔
بلاول بھٹو نے نام نہاد 'پرنسز گلوریا' نامی شخصیت سے بھی مکمل لاعلمی کا اظہار کیا۔
پی پی پی چیئرمین نے مزید کہا کہ اس نوعیت کا سوشل میڈیا ڈرامہ اور افواہیں ملک میں درپیش حقیقی اور اہم ترین مسائل سے عوام کی توجہ ہٹانے کی ایک کوشش ہیں۔
انہوں نے واضح کیا کہ اگر ان کی ذاتی زندگی کے حوالے سے کوئی بھی اہم فیصلہ ہوگا تو اس کا باضابطہ اعلان ان کا خاندان خود کرے گا، تب تک لوگ ان افواہوں پر دھیان دینے کے بجائے حقیقی مسائل پر توجہ مرکوز رکھیں۔