پاکستانی ریسلر انعام بٹ کا ڈوپ ٹیسٹ مثبت آنے کے معاملے میں اہم پیش رفت سامنے آئی ہے۔ذرائع کے مطابق انعام بٹ نے ایشین بیچ گیمز میں ڈوپ ٹیسٹ سے قبل آنکھوں کی بیماری کے علاج کے لیے استعمال کی جانے والی دوا سے متعلق معلومات فراہم نہیں کیں جس کے بعد ان کا ڈوپ ٹیسٹ مثبت آیا اور مئی میں انہیں نوٹس جاری کیا گیا۔
ذرائع کا کہنا ہے کہ انعام بٹ نے آنکھوں کے ٹیسٹ، اسکینز اور استعمال کی جانے والی ادویات کی مکمل فہرست متعلقہ حکام کو فراہم کردی جبکہ آئی ٹی اے نے کیس کا جائزہ لینے کے ساتھ ان کا دوبارہ ٹیسٹ بھی کیا۔ ممنوعہ دوا کی مقدار انتہائی کم اور علاج کے لیے استعمال ہونے والی تھی، قوت بخش دوا نہیں تھی۔
ذرائع کے مطابق انعام بٹ کو مذکورہ ادویات استعمال کرنے کی اجازت بھی دے دی گئی ہے تاہم ٹیسٹ سے قبل دوا کے استعمال سے آگاہ نہ کرنے پر ان کے خلاف کارروائی کا امکان موجود ہے۔ معاملے پر متعلقہ اتھارٹیز سے خط و کتابت جاری ہے جبکہ انعام بٹ بی سیمپل ٹیسٹ کے لیے نہیں جائیں گے اور ضرورت پڑنے پر کیس کو کھیلوں کی ثالثی عدالت میں لے جایا جا سکتا ہے۔