ٹھٹہ کے علاقے پیر جو گوٹھ کے قریب ایک دردناک حادثے میں ٹریکٹر ٹرالی سڑک کے قریب سے گزرتی بجلی کے تاروں سے ٹکرا گئی، جس کے نتیجے میں خاتون سمیت 6 افراد کرنٹ لگنے سے موقع پر ہی جاں بحق ہوگئے۔
پولیس حکامات کا کہنا ہے کہ حادثے کا شکار ہونے والے افراد دھان کی کٹائی کا کام ختم کرنے کے بعد ٹریکٹر ٹرالی پر سوار ہو کر اپنے گاؤں واپس لوٹ رہے تھے کہ یہ واقعہ پیش آیا۔
ریسکیو ذرائع کے مطابق حادثے کی اطلاع ملتے ہی امدادی ٹیموں نے موقع پر پہنچ کر امدادی کارروائیاں شروع کیں اور بجلی کی زد میں آ کر زخمی ہونے والے 2 افراد کو فوری طبی امداد کے لیے نزدیکی اسپتال منتقل کردیا، جبکہ جاں بحق افراد کی لاشوں کو بھی ضروری قانونی کارروائی کے لیے اسپتال منتقل کر دیا گیا ہے۔