چیئرمین پیپلز پارٹی بلاول بھٹو زرداری نے ملک کو درپیش مسائل، صوبوں کے معاملات اور نظام میں موجود خامیوں پر پارلیمنٹ میں کھلی بحث کا مطالبہ کردیا۔
لندن میں میڈیا سے گفتگو کرتے ہوئے بلاول بھٹو زرداری نے کہا کہ پاکستان کے مسائل کا حل کسی ایک سیاسی جماعت کے پاس نہیں، تمام سیاسی قوتوں کو قومی اور عوامی معاملات پر ایک دوسرے سے رابطہ اور بامقصد بات چیت کرنا ہوگی۔
انہوں نے کہا کہ پارلیمنٹ میں اس بات پر سنجیدگی سے بحث ہونی چاہیے کہ موجودہ نظام کہاں ناکام ہوا اور ان مسائل کا حل کیا ہوسکتا ہے۔ قومی اسمبلی میں ملک کو درپیش چیلنجز اور صوبوں سے متعلق معاملات پر کھل کر گفتگو کی ضرورت ہے۔
بلاول بھٹو زرداری کا کہنا تھا کہ نظام میں موجود مسائل کو نظر انداز کرنے کے بجائے ان پر کھل کر بات ہونی چاہیے جبکہ ملک کو درپیش قومی معاملات کے حل کے لیے تمام سیاسی جماعتوں کو اپنا کردار ادا کرنا ہوگا۔