وزارت خزانہ نے پنشنرز کے لیے نئے قواعد کا نوٹیفکیشن جاری کردیا جس کے تحت آئندہ پنشن کی ادائیگی ڈیجیٹل پنشن نظام کے ذریعے کی جائے گی اور پرانا کاغذی تصدیقی طریقہ ختم کردیا گیا ہے۔
وزارت خزانہ کے مطابق ہر پنشنر کو چھ ماہ بعد نادرا کے ذریعے ڈیجیٹل تصدیق کرانا لازمی ہوگا۔ یہ تصدیق نادرا کی پاک آئی ڈی ایپ یا مجاز نادرا مراکز کے ذریعے مکمل کی جاسکے گی۔
نئے نظام کے تحت پنشن کی رقم براہ راست پنشنر کے بینک اکاؤنٹ میں منتقل کی جائے گی جبکہ مارچ اور ستمبر میں تصدیق کرانے کا سابقہ مقررہ شیڈول بھی ختم کردیا گیا ہے۔
دستاویز کے مطابق بینک اب پنشنرز سے الگ سے بائیومیٹرک تصدیق یا لائف سرٹیفکیٹ طلب نہیں کریں گے اور پنشن اکاؤنٹ کو صرف تصدیق نہ ہونے کی بنیاد پر ڈورمنٹ نہیں کیا جائے گا۔
وزارت خزانہ کا کہنا ہے کہ پنشن اکاؤنٹ بند نہیں ہوگا، تاہم اگر پنشنر مسلسل چھ ماہ تک اپنی ڈیجیٹل تصدیق مکمل نہیں کراتا تو پنشن کی منتقلی عارضی طور پر روک دی جائے گی۔ تصدیق مکمل ہوتے ہی پنشن کی ادائیگی دوبارہ شروع کردی جائے گی۔