اسلام آباد ہائیکورٹ نے پاکستان تحریک انصاف کے 27 ستمبر کو متوقع احتجاج اور لانگ مارچ کے خلاف دائر درخواست پر گزشتہ سماعت کا تحریری حکم نامہ جاری کرتے ہوئے کیس کی سماعت کے لیے 3 رکنی لارجر بینچ تشکیل دے دیا ہے۔
لارجر بینچ کی سربراہی چیف جسٹس سرفراز ڈوگر کریں گے جبکہ جسٹس اعظم خان اور جسٹس محمد آصف بھی بینچ کا حصہ ہوں گے۔
چیف جسٹس سرفراز ڈوگر کی جانب سے جاری 3 صفحات پر مشتمل تحریری حکم نامے میں چاروں صوبوں کے چیف سیکریٹریز اور انسپکٹر جنرلز پولیس کو کل ذاتی حیثیت میں عدالت کے روبرو پیش ہونے کا حکم دیا گیا ہے۔
عدالت نے چیف کمشنر اسلام آباد، آئی جی اسلام آباد اور ڈپٹی کمشنر اسلام آباد کو بھی ذاتی حیثیت میں طلب کرلیا ہے۔
تحریری حکم نامے کے مطابق ایک تاجر نے پی ٹی آئی کے مجوزہ احتجاج کے خلاف درخواست دائر کی تھی۔ درخواست گزار کے وکیل نے عدالت کو احتجاج کے نتیجے میں پیدا ہونے والے ممکنہ نقصانات سے آگاہ کرتے ہوئے مؤقف اختیار کیا کہ اسلام آباد میں احتجاج اور جلسوں سے متعلق قوانین پہلے سے موجود ہیں۔
عدالت نے قرار دیا کہ معاملہ اہم نوعیت کا ہے اس لیے اٹارنی جنرل پاکستان کو عدالتی معاونت کے لیے نوٹس جاری کیا جاتا ہے۔
واضح رہے کہ پاکستان تحریک انصاف کے رہنما اور خیبرپختونخوا کے وزیراعلیٰ سہیل آفریدی نے عمران خان کو اہلخانہ اور ذاتی معالجین تک رسائی نہ دیے جانے کے معاملے پر 27 ستمبر کو احتجاج اور لانگ مارچ کا اعلان کر رکھا ہے۔