راولپنڈی اڈیالہ روڈ کی منور کالونی کے قریب گرین بس کی موٹر سائیکل کو ٹکر کے نتیجے میں موٹر سائیکل پر سوار کمسن بچی جاں بحق ہوگئی۔
ذرائع کے مطابق حادثہ اڈیالہ روڈ پر ایک نجی مارٹ کے سامنے پیش آیا، جہاں گرین بس نے موٹر سائیکل کو ٹکر ماری۔ حادثے کے نتیجے میں موٹر سائیکل پر سوار بچی شدید زخمی ہوئی اور موقع پر ہی دم توڑ گئی۔
ذرائع کا کہنا ہے کہ بس کی زد میں آنے سے بچی کا سر کچلا گیا، تاہم موٹر سائیکل سوار بچی کا والد اور دوسری کمسن بچی معجزانہ طور پر محفوظ رہے۔
حادثے کے بعد شہریوں نے گرین بس کے ڈرائیور کو پکڑ لیا، جبکہ پولیس بھی موقع پر پہنچ گئی۔ پولیس نے واقعے کی تحقیقات شروع کردی ہیں۔