کراچی کے علاقے اورنگی ٹاؤن سیکٹر 11 ایل بلاک کے قریب واقع ایک اسکول کی دیوار گرنے کے نتیجے میں متعدد افراد ملبے تلے دب گئے۔
واقعے کے فوری بعد امدادی ٹیموں اور ریسکیو اہلکاروں نے موقع پر پہنچ کر امدادی کارروائیاں شروع کردیں۔
ریسکیو ذرائع کے مطابق ملبے سے 5 افراد کی لاشیں نکال لی گئی ہیں جبکہ متعدد افراد کے زخمی ہونے کی اطلاعات ہیں۔
ملبے تلے مزید افراد کے دبے ہونے کا خدشہ ہے، جنہیں نکالنے کے لیے ریسکیو آپریشن تاحال جاری ہے۔
ایس ایس پی ویسٹ کے مطابق مومن آباد تھانے کی حدود اورنگی ٹاؤن میں فٹبال چورنگی پر واقع بند گورنمنٹ اسکول کی خستہ حال دیوار گرنے سے 5 افراد جاں بحق جبکہ 2 زخمی ہوگئے۔
حادثے کے نتیجے میں مجموعی طور پر 7 افراد ملبے تلے دب گئے تھے، جنہیں ریسکیو ٹیموں نے فوری کارروائی کرتے ہوئے نکال کر اسپتال منتقل کردیا۔
پولیس کے مطابق ابتدائی اطلاعات کے مطابق کچھ نشئی افراد خستہ حال دیوار سے سریا نکالنے کی کوشش کر رہے تھے جو اس دلخراش واقعے کا سبب بنا۔