ویمنز ٹی20 ایشیا کپ کے دوسرے سیمی فائنل میں دفاعی چیمپئن سری لنکا نے پاکستان کو 4 وکٹوں سے شکست دے کر فائنل میں جگہ بنا لی۔
پاکستان نے پہلے بیٹنگ کرتے ہوئے مقررہ 20 اوورز میں 5 وکٹوں کے نقصان پر 130 رنز بنائے۔ کپتان فاطمہ ثنا نے 36 گیندوں پر ناقابلِ شکست 47 رنز کی شاندار اننگز کھیلی، جبکہ شوال ذوالفقار نے 24 اور گل فیروزہ نے 21 رنز بنائے۔
جواب میں سری لنکا نے 18.4 اوورز میں 6 وکٹوں کے نقصان پر ہدف حاصل کرلیا۔ ہرشیتھا سماراوکرما نے 36 اور کویشا دلہاری نے 33 رنز کی اہم اننگز کھیلی۔
فاطمہ ثنا نے بیٹنگ کے بعد بولنگ میں بھی عمدہ کارکردگی دکھاتے ہوئے 38 رنز دے کر 4 وکٹیں حاصل کیں، تاہم ان کی آل راؤنڈ کارکردگی پاکستان کو فائنل میں پہنچانے کے لیے کافی ثابت نہ ہوسکی۔اب ایشیا کپ کا فائنل اتوار کو بھارت اور سری لنکا کی ویمنز ٹیموں کے درمیان کھیلا جائے گا۔