اسلام آباد میں 27 ستمبر کے احتجاج سے قبل پاکستان تحریک انصاف کے ارکان اسمبلی کی گرفتاریوں اور ملک میں تیزی سے بدلتی سیاسی صورتحال کے پیش نظر خیبر پختونخوا اسمبلی کا ہنگامی اجلاس آج طلب کرلیا گیا۔
ذرائع کے مطابق اسلام آباد سے خیبر پختونخوا اسمبلی کے رکن ناصر الملک کو بھی گرفتار کرلیا گیا ہے۔ دوسری جانب صوبائی وزیر شکیل خان پر مبینہ فائرنگ کے واقعے نے بھی سیاسی صورتحال میں مزید تشویش پیدا کردی ہے۔
ان حالات کے پیش نظر اسپیکر خیبر پختونخوا اسمبلی بابر سلیم سواتی نے اسمبلی کا ہنگامی اجلاس طلب کیا ہے، جو آج رات 7 بجے ہوگا۔
ذرائع کا کہنا ہے کہ اجلاس میں پی ٹی آئی ارکان اسمبلی کی گرفتاریوں، صوبائی وزیر شکیل خان پر مبینہ فائرنگ کے واقعے اور مجموعی سیاسی صورتحال پر تفصیلی تبادلہ خیال کیا جائے گا، جبکہ موجودہ صورتحال سے متعلق اہم فیصلے بھی متوقع ہیں۔