کراچی کے شہری ملک بھر میں سب سے مہنگا آٹا خریدنے پر مجبور ہیں، جہاں 20 کلو آٹے کے تھیلے کی قیمت 3 ہزار 540 روپے تک پہنچ گئی ہے۔ وفاقی ادارہ شماریات کی تازہ رپورٹ میں ملک کے مختلف شہروں میں آٹے کی قیمتوں کے اعداد و شمار جاری کیے گئے ہیں، جن کے مطابق کراچی مہنگے آٹے کے حوالے سے پہلے نمبر پر ہے۔
رپورٹ کے مطابق حیدرآباد میں 20 کلو آٹے کا تھیلا 3 ہزار 400 روپے میں فروخت ہو رہا ہے، جبکہ اسلام آباد میں اس کی قیمت 3 ہزار 333 روپے 33 پیسے اور راولپنڈی میں 3 ہزار 306 روپے 66 پیسے ریکارڈ کی گئی ہے۔
اسی طرح لاڑکانہ اور پشاور میں 20 کلو آٹے کے تھیلے کی قیمت 3 ہزار 300 روپے ہے۔ اعداد و شمار کے مطابق کراچی میں آٹے کی قیمت حیدرآباد، اسلام آباد، راولپنڈی، لاڑکانہ اور پشاور کے مقابلے میں زیادہ ہے، جس سے شہر میں اشیائے خورونوش کی بڑھتی قیمتوں کا اندازہ لگایا جاسکتا ہے۔