وفاقی وزیر برائے آئی ٹی و ٹیلی کمیونیکیشن شزہ فاطمہ خواجہ نے کہا ہے کہ موبائل انٹرنیٹ سروس کی بندش سے متعلق تاحال وزارتِ داخلہ کی جانب سے پاکستان ٹیلی کمیونیکیشن اتھارٹی (پی ٹی اے) کو کوئی باضابطہ ہدایت موصول نہیں ہوئی۔
شزہ فاطمہ خواجہ نے میڈیا سے گفتگو کرتے ہوئے بتایا کہ پی ٹی اے موبائل انٹرنیٹ سروس بند کرنے کا فیصلہ وزارتِ داخلہ کی ہدایات کی روشنی میں کرتا ہے، تاہم اب تک وزارتِ داخلہ کی جانب سے اس حوالے سے کوئی درخواست یا باضابطہ ہدایت نہیں دی گئی۔
وفاقی وزیر کا کہنا تھا کہ گزشتہ ڈیڑھ سے دو سال کے دوران قومی سطح پر انٹرنیٹ کی بندش نہیں کی گئی، جبکہ امن و امان برقرار رکھنے کی ذمہ داری وزارتِ داخلہ کی ہے۔
شزہ فاطمہ خواجہ نے کہا کہ اگر پاکستان تحریکِ انصاف کے لانگ مارچ کے دوران امن و امان کی صورتحال کے پیش نظر انٹرنیٹ سروس بند کرنے کی ضرورت محسوس ہوئی تو یہ اقدام محدود پیمانے پر کیا جائے گا۔
انہوں نے امید ظاہر کی کہ صورتحال قابو میں رہے گی اور موبائل انٹرنیٹ کی بندش کی ضرورت پیش نہیں آئے گی۔