بہاولپور میں قومی اسمبلی کے حلقے این اے 168 میں ضمنی انتخاب کے لیے پولنگ کا عمل بغیر کسی وقفے کے شام 5 بجے تک کے لیے شروع ہوگیا ہے۔
اس حلقے میں کل ووٹرز کی تعداد 4 لاکھ 83 ہزار 143 ہے، جبکہ انتخاب کے انعقاد کے لیے 292 پولنگ اسٹیشنز اور 896 پولنگ بوتھ قائم کیے گئے ہیں جن میں سے 16 پولنگ اسٹیشنز کو انتہائی حساس قرار دیا گیا ہے۔
یہ نشست ملک اقبال چنڑ کی وفات کی وجہ سے خالی ہوئی تھی، جس پر کل 20 امیدوار میدان میں ہیں۔ الیکشن میں بنیادی مقابلہ مسلم لیگ (ن) کے ملک منیر اقبال چنڑ اور آزاد امیدوار ولی داد چیمہ کے درمیان متوقع ہے۔
ملک منیر اقبال چنڑ کو مسلم لیگ (ن) کے ساتھ ساتھ پاکستان پیپلز پارٹی کی حمایت بھی حاصل ہے، جبکہ آزاد امیدوار ولی داد چیمہ کو ان کے والد رکن قومی اسمبلی طارق بشیر چیمہ کی حمایت حاصل ہے۔
پولنگ کے دوران سیکیورٹی کے لیے فوج اور رینجرز کو تعینات کیا گیا ہے جبکہ 3,022 پولیس افسران اور جوان بھی اپنے فرائض سرانجام دے رہے ہیں۔