بلوچستان میں سکیورٹی فورسز نے گزشتہ 96 گھنٹوں کے دوران مختلف آپریشنز کے دوران 71 سے زائد دہشت گردوں کو ہلاک کر دیا ہے۔
پاک فوج کے شعبہ تعلقات عامہ (آئی ایس پی آر) کے مطابق 21 ستمبر کو ضلع کوئٹہ کے علاقے شعبان، زیارت اور گردونواح میں خفیہ اطلاعات پر آپریشن شروع کیا گیا، جس میں متعدد ٹھکانوں کو کلیئر کرتے ہوئے شدید فائرنگ کے تبادلے میں 33 دہشت گرد ہلاک کیے گئے اور ان کے قبضے سے اسلحہ و دھماکا خیز مواد برآمد کر لیا گیا۔ ترجمان کے مطابق گزشتہ 72 گھنٹوں میں کارروائیوں میں شدت لائی گئی، جس کے نتیجے میں مزید 23 دہشت گرد مارے گئے اور علاقے کو کلیئر کرایا گیا۔
آئی ایس پی آر نے مزید بتایا کہ 25 ستمبر کو ضلع نوشکی میں کی گئی ایک الگ کارروائی کے دوران 11 دہشت گرد ہلاک ہوئے، جبکہ منڈ کے علاقے میں ایک اور کارروائی کے دوران 6 دہشت گردوں کو جہنم واصل کر کے بھاری مقدار میں اسلحہ و گولہ بارود برآمد کیا گیا۔
ترجمان کے مطابق قومی ایکشن پلان کی وفاقی ایپکس کمیٹی کے منظور کردہ "عزمِ استحکام" وژن کے تحت انسدادِ دہشت گردی کی کارروائیاں جاری رہیں گی اور سکیورٹی فورسز ملک سے بیرونی سرپرستی یافتہ دہشت گردی کے مکمل خاتمے کے لیے پرعزم ہیں۔