مری میں انگوری روڈ پر اسکول وین میں آگ لگنے کے واقعے کی ابتدائی رپورٹ سامنے آگئی۔رپورٹ کے مطابق وین میں ڈرائیور سمیت 11 افراد سوار تھے جبکہ گاڑی میں صرف 8 افراد کی گنجائش تھی۔ حادثے میں وین میں سوار تمام 11 افراد زخمی ہوئے۔
ابتدائی رپورٹ میں بتایا گیا ہے کہ وین میں آگ مبینہ طور پر بیٹری میں اسپارکنگ کے باعث لگی جبکہ حادثے کے وقت گاڑی میں آگ بجھانے کا آلہ بھی موجود نہیں تھا۔
دریں اثنا وزیراعلیٰ پنجاب مریم نواز نے حادثے میں طلبا کے زخمی ہونے پر افسوس کا اظہار کرتے ہوئے رپورٹ طلب کرلی۔ وزیراعلیٰ نے وین میں اوورلوڈنگ اور آتشزدگی سے بچاؤ کے حفاظتی انتظامات نہ ہونے کا بھی نوٹس لیا ہے۔
واضح رہے کہ منگل کی صبح مری میں اسکول کے بچوں کو لے جانے والی وین میں آگ لگنے سے 10 بچے جھلس کر زخمی ہوگئے تھے۔ ڈپٹی کمشنر مری کے مطابق زخمی بچوں کی حالت خطرے سے باہر ہے جبکہ بعض بچوں کو ہولی فیملی اسپتال منتقل کیا گیا ہے۔