صومالیہ میں سمندری قزاقوں کی فائرنگ سے جاں بحق پاکستانی شہری سید کاشف عمر کی نمازِ جنازہ کراچی کی جامع مسجد غوث الاعظم میں ادا کر دی گئی۔
نمازِ جنازہ میں گورنر سندھ سید محمد نہال ہاشمی، امیر جماعت اسلامی کراچی منعم ظفر خان اور ایم کیو ایم کے رہنما جمال احمد نے شرکت کی۔ اس کے علاوہ صومالیہ واقعے میں زخمی ہونے والے یاسر، شہید کے اہلخانہ، قریبی رشتہ داروں اور شہریوں کی بڑی تعداد نے بھی جنازے میں شرکت کی۔
گورنر سندھ نے جامع مسجد غوث الاعظم آمد کے موقع پر شہید سید کاشف عمر کے درجات کی بلندی کے لیے دعا کی اور ان کے والد اور بیٹے سمیت دیگر اہلخانہ سے دلی ہمدردی و تعزیت کا اظہار کیا۔
اس موقع پر گفتگو کرتے ہوئے گورنر سندھ کا کہنا تھا کہ صومالیہ میں پاکستانی شہریوں کی شہادت انتہائی افسوسناک واقعہ ہے۔