وزیر مملکت داخلہ طلال چوہدری نے کہا ہے کہ اپوزیشن مذاکرات کے حوالے سے مکمل حقائق سامنے نہیں لا رہی مذاکرات کو دانستہ طور پر نتیجہ خیز نہیں بننے دیا گیا۔
پریس کانفرنس میں طلال چوہدری نے بتایا کہ اپوزیشن کی مذاکراتی ٹیم اسلام آباد سے پشاور گئی اور سہیل آفریدی سے ملاقات کی جہاں مذاکرات کے بنیادی نکات پر اتفاق رائے بھی ہوگیا تھا۔ وزیراعلیٰ خیبر پختونخوا کو بھی مذاکراتی عمل میں شامل ہونے کی دعوت دی گئی تھی۔
انہوں نے کہا کہ بانی کی صحت، ملاقاتوں اور دیگر سیاسی معاملات سمیت متعدد امور پر اتفاق ہوگیا تھا اور مذاکرات میں اہم پیش رفت ہوچکی تھی تاہم آخری مرحلے میں نئی شرائط عائد کردی گئیں جس سے مذاکراتی عمل آگے نہ بڑھ سکا۔
طلال چوہدری کا کہنا تھا کہ دہشت گردی کے خاتمے سے متعلق معاملات کو بھی مذاکرات میں نظر انداز کیا گیا۔ ملک اور قوم کی سلامتی سیاسی مفادات سے زیادہ اہم ہے، دہشت گردی کے خاتمے کے لیے سیاسی گنجائش دی جاسکتی ہے۔