اقوام متحدہ کے سیکرٹری جنرل انتونیو گوتریس نے پاکستان کے دورے کے دوران اقوام متحدہ میں پاکستان کے کردار اور عالمی امن کے لیے اس کی خدمات کو سراہا ہے۔
اسلام آباد میں گفتگو کرتے ہوئے انتونیو گوتریس نے کہا کہ پاکستان اقوام متحدہ کے لیے خصوصی اہمیت رکھتا ہے اور عالمی امن کے قیام کے لیے پاکستان کی امن مشنز میں خدمات قابلِ قدر ہیں۔ انہوں نے افغان مہاجرین کی باعزت واپسی کے لیے پاکستان کی کوششوں کی بھی تعریف کی۔
اقوام متحدہ کے سیکرٹری جنرل نے امریکا اور ایران کے درمیان کشیدگی کے خاتمے اور مذاکرات کے لیے پاکستان کی سفارتی کوششوں کو بھی سراہا۔ انہوں نے کہا کہ فلسطینی عوام کے حق خودارادیت کے بغیر دنیا میں پائیدار امن ممکن نہیں۔
گوتریس نے کہا کہ تمام تنازعات کو مذاکرات اور بات چیت کے ذریعے حل کیا جاسکتا ہے۔ انہوں نے اپنے اقوام متحدہ کے منصب کی مدت مکمل ہونے کے بعد کسی سیاسی عہدے یا سیاسی عزائم سے متعلق بھی واضح کیا کہ ان کا ایسا کوئی ارادہ نہیں۔