پاکستان نے مقامی سطح پر تیار کیے گئے فتح 4 گراؤنڈ لانچڈ کروز میزائل کے توسیع شدہ ورژن کا کامیاب تجربہ کر لیا۔
آئی ایس پی آر کے مطابق جدید ایویونکس اور جدید ترین نیوی گیشن سسٹم سے لیس فتح 4 ایکسٹینڈڈ ورژن طویل فاصلے تک اہداف کو انتہائی درستگی اور مؤثر انداز میں نشانہ بنانے کی صلاحیت رکھتا ہے۔
آئی ایس پی آر کا کہنا ہے کہ تجربے کے دوران میزائل کے مختلف ذیلی نظاموں کے اضافی تکنیکی پیرامیٹرز بھی جانچے گئے، جن کا مقصد درستگی میں بہتری اور نظام کی بقا کی صلاحیت کو مزید مؤثر بنانا ہے۔
ترجمان پاک فوج کے مطابق تجربے کا مشاہدہ پاک فوج کے سینئر افسران، سائنسدانوں اور متعلقہ ادارے کے انجینئرز نے کیا۔
صدر مملکت، وزیراعظم، چیف آف آرمی اسٹاف و چیف آف ڈیفنس فورسز اور سروسز چیفس نے فتح 4 ایکسٹینڈڈ ورژن کے کامیاب تجربے پر متعلقہ حکام، سائنسدانوں اور انجینئرز کو مبارکباد دی اور اس اہم سنگِ میل کے حصول میں ان کی تکنیکی صلاحیت، لگن اور عزم کو سراہا۔