اسلام آباد پولیس کے تمام رینکس کے لیے سوشل میڈیا کے استعمال سے متعلق نئی پالیسی جاری کردی گئی، جس کی منظوری آئی جی اسلام آباد نے دے دی ہے۔
نئی پالیسی کے تحت پولیس اہلکاروں کے یونیفارم میں ویڈیوز اور تصاویر بنانے پر مکمل پابندی عائد کردی گئی ہے۔ پولیس یونیفارم کو ذاتی تشہیر، شہرت یا گلیمر کے لیے استعمال کرنے کی بھی اجازت نہیں ہوگی۔
پالیسی کے مطابق پولیس اہلکار سوشل میڈیا پر اپنی پیشہ ورانہ حیثیت اور محکمانہ نظم و ضبط کو مدنظر رکھتے ہوئے سرگرمیاں جاری رکھیں گے۔
نئی سوشل میڈیا پالیسی کی خلاف ورزی کرنے والے اہلکاروں کے خلاف سخت محکمانہ کارروائی کی جائے گی، جبکہ پالیسی کا اطلاق فوری طور پر ہوگا۔