وزیراعظم کے مشیر رانا ثناء اللہ نے کہا ہے کہ حکومت کی جانب سے مذاکرات کے دروازے کھلے ہیں، وزیراعظم نے گزشتہ روز بھی اپوزیشن کو مذاکرات کے لیے بیٹھنے کی دعوت دی ہے۔
پریس کانفرنس کرتے ہوئے رانا ثناء اللہ نے کہا کہ ریاست کو یرغمال بنانے کی اجازت نہیں دی جاسکتی، ریاست کو یرغمال بنا کر کسی بھی مطالبے کو منوانا ممکن نہیں۔
انہوں نے کہا کہ پاکستان تحریک انصاف مسلسل عدم استحکام کے ایجنڈے پر چل رہی ہے، تمام مسائل اور ایشوز کو مذاکرات کے ذریعے حل کیا جانا چاہیے۔
رانا ثناء اللہ کا کہنا تھا کہ ذاتی ایجنڈے کو قومی مفادات پر ترجیح نہیں دی جانی چاہیے، ملک میں سیاسی مسائل کے حل کے لیے بات چیت اور مذاکرات کا راستہ اختیار کرنا ہوگا۔