چیئرمین پی ٹی آئی بیرسٹر گوہر نے کہا ہے کہ وزیراعظم نے لانگ مارچ ختم کرنے کی شرط رکھ کر اچھا نہیں کیا، مذاکرات تو احتجاج ختم کرنے کے لیے ہی ہو رہے تھے۔
اپنے بیان میں بیرسٹر گوہر نے کہا کہ سیاست میں لائنز نہیں کھینچی جاتیں، بات چیت ہونی چاہیے، تاہم لانگ مارچ بھی ہوگا۔
انہوں نے کہا کہ مذاکرات کے دوران جو باتیں ہوئیں وہ باہر نہیں آنی چاہئیں تھیں، مذاکرات کی باتیں باہر آنے پر جس نے بھی ایسا کیا، مجھے اس سے شکوہ ہے۔
بیرسٹر گوہر کا کہنا تھا کہ مذاکرات کے عمل کو سنجیدگی سے آگے بڑھانے کی ضرورت ہے اور سیاسی معاملات کا حل بات چیت کے ذریعے ہی تلاش کیا جانا چاہیے۔