سائنس کی دنیا کا ایک اور بڑا اعزاز اپنے حقداروں تک پہنچ گیا۔ 2026 کا نوبیل انعام برائے کیمسٹری فرانس کے ہنری بی کگان اور جاپان کے کینسو سوائی کو دینے کا اعلان کیا گیا ہے۔
رائل سویڈش اکیڈمی آف سائنسز کے مطابق دونوں سائنسدانوں کو یہ اعزاز asymmetric organic synthesis میں non-linear effects اور autocatalysis سے متعلق اہم دریافتوں پر دیا گیا ہے۔ ان کی تحقیق نے کیمسٹری کے ایک ایسے بنیادی مسئلے کو سمجھنے میں مدد دی جس پر سائنسدان طویل عرصے سے کام کررہے تھے۔
اس تحقیق کا مرکز ایسے مالیکیولز ہیں جو ایک دوسرے کا عکس تو دکھائی دیتے ہیں لیکن مکمل طور پر ایک جیسے نہیں ہوتے۔ اسے سمجھنے کے لیے انسانی ہاتھوں کی مثال دی جاسکتی ہے۔ دایاں اور بایاں ہاتھ ایک دوسرے کے آئینے جیسے نظر آتے ہیں مگر دونوں کو ایک دوسرے پر رکھیں تو وہ مکمل طور پر نہیں ملتے۔ کیمسٹری میں ایسی خاصیت کو chirality کہا جاتا ہے۔
کگان اور سوائی کی تحقیق نے سائنسدانوں کو یہ سمجھنے میں اہم پیش رفت دی کہ کیمیائی عمل کے دوران مطلوبہ شکل کے مالیکیول کو ترجیحی طور پر کیسے تیار کیا جاسکتا ہے۔ اس پیش رفت کی اہمیت ادویات کی تیاری سمیت کئی شعبوں میں ہے کیونکہ ایک ہی مالیکیول کی دو آئینہ نما شکلیں انسانی جسم میں مختلف اثرات پیدا کرسکتی ہیں۔
ہنری کگان کی تحقیق نے ایسے کیمیائی طریقوں کی بنیاد مضبوط کی جن سے ایک مخصوص آئینہ نما شکل زیادہ مقدار میں حاصل کی جاسکتی ہے، جبکہ کینسو سوائی نے ایک ایسا غیر معمولی کیمیائی ردعمل دریافت کیا جس میں مطلوبہ سالماتی شکل خود اپنے بننے کے عمل کو مزید تیز کرتی ہے۔
دونوں سائنسدان 12 ملین سویڈش کرونا کی انعامی رقم مشترکہ طور پر حاصل کریں گے۔ نوبیل انعام کی روایتی تقریب 10 دسمبر کو اسٹاک ہوم میں منعقد ہوگی جہاں فاتحین کو تمغے اور اسناد پیش کی جائیں گی۔
کیمسٹری کا انعام رواں نوبیل ہفتے کا تیسرا بڑا اعلان ہے۔ اس سے قبل طب اور طبیعیات کے شعبوں کے فاتحین کے نام سامنے آچکے ہیں۔
گزشتہ برس 2025 میں کیمسٹری کا نوبیل انعام سوسومو کٹاگاوا، رچرڈ روبسن اور عمر ایم یاغی کو metal-organic frameworks تیار کرنے پر دیا گیا تھا۔ ان کے بنائے گئے سالماتی ڈھانچے پانی حاصل کرنے، کاربن ڈائی آکسائیڈ کو جذب کرنے اور مختلف کیمیائی مادوں کو محفوظ کرنے جیسے کاموں میں استعمال کیے جاسکتے ہیں۔