راولپنڈی میں آئی جے پی روڈ پر نور اسٹیشن کے قریب جعفر ایکسپریس کی ایک بوگی پٹری سے اتر گئی، تاہم حادثے میں کوئی جانی نقصان نہیں ہوا۔
ریلوے حکام کے مطابق جعفر ایکسپریس پشاور سے کوئٹہ جارہی تھی کہ نور اسٹیشن کے قریب ٹرین کا آخری پاور پلانٹ کا حصہ ڈی ریل ہوگیا۔ واقعے کی اطلاع ملتے ہی ریلوے افسران موقع پر پہنچ گئے جبکہ کنٹرول روم سے بھی صورتحال کی نگرانی کی جارہی ہے۔
حکام کا کہنا ہے کہ متاثرہ ٹریک کی بحالی کے لیے کام جاری ہے اور اسے جلد بحال کردیا جائے گا۔
دوسری جانب بلوچستان میں ضروری مرمتی کاموں کے باعث ٹرین آپریشن عارضی طور پر معطل کردیا گیا ہے۔ ریلوے حکام کے مطابق آج کوئٹہ سے پشاور روانہ ہونے والی جعفر ایکسپریس منسوخ کردی گئی، جبکہ پشاور سے کوئٹہ جانے والی جعفر ایکسپریس کو جیکب آباد تک محدود کردیا گیا ہے۔
حکام کے مطابق سریاب اور کچلاک کے درمیان چلنے والی جناح پیپلز ٹرین سروس بھی معطل کردی گئی ہے۔ ٹرینوں کی اچانک منسوخی اور روٹس محدود کیے جانے کے باعث مسافروں کو مشکلات کا سامنا ہے، تاہم منسوخ ہونے والی ٹرینوں کے مسافروں کو ٹکٹوں کی رقم واپس کردی جائے گی۔