صدر مملکت آصف علی زرداری نے فلسطین کے صدر محمود عباس کے نام خط میں ریاست فلسطین کے اعلانِ آزادی کی 38ویں سالگرہ پر انہیں اور فلسطینی عوام کو مبارکباد پیش کی ہے۔
صدر مملکت نے اپنے پیغام میں فلسطینی عوام کے جائز حقوق، خصوصاً حقِ خودارادیت کے حصول کے لیے پاکستان کی غیرمتزلزل حمایت کا اعادہ کیا۔ انہوں نے کہا کہ پاکستان اور فلسطین کے مابین گہرے برادرانہ تعلقات قائم ہیں اور پاکستانی عوام فلسطینی بھائیوں کو انتہائی عزت و احترام کی نگاہ سے دیکھتے ہیں۔
آصف علی زرداری نے دونوں ممالک کے درمیان دوستی اور بھائی چارے کے رشتوں کو مزید مستحکم بنانے کے عزم کا اظہار کرتے ہوئے آزاد، خودمختار، قابلِ عمل اور جغرافیائی طور پر مربوط فلسطینی ریاست کے قیام کے لیے پاکستان کے اصولی مؤقف کو دہرایا۔
صدر مملکت نے فلسطینی عوام کو درپیش مشکلات اور مصائب پر ان کے ساتھ یکجہتی کا اظہار کرتے ہوئے کہا کہ پاکستان فلسطینی عوام کی آزادی، پائیدار امن اور باوقار مستقبل کی خواہشات کی حمایت جاری رکھے گا۔