اس منصوبے کی خاص بات صرف یہ نہیں کہ ڈیری خواتین چلاتی ہیں۔ بلکہ ڈیری میں دودھ فراہم کرنے والے کسانوں کے گھر کی خاتون کے بینک اکاؤنٹ میں دودھ کی رقم جمع کی جاتی ہے۔
’پہلے ہم اپنے شوہروں سے پوچھے بغیر کوئی کام نہیں کرتے تھے، لیکن اب چونکہ ہمارے اکاؤنٹ میں پیسے آتے ہیں، اس لیے شوہر بھی ہم سے پوچھے بغیر کوئی کام نہیں کرتے۔‘
یہ کہنا ہے جناتائی رنکھامب کا جو بی بی سی مراٹھی سے گفتگو کر رہی تھیں۔
وہ ضلع دھاراشیو کے گاؤں جہاگیردارواڑی میں شمسی توانائی سے چلنے والا ڈیری فارم چلاتی ہیں۔ ان کی ڈیری پر گاؤں کے کسان دودھ لے کر آتے ہیں۔
وہ خود اس دودھ کا وزن، اس میں موجود چکنائی (فیٹ) اور دیگر اجزا کی جانچ کرتی ہیں۔ اس کے بعد دودھ کو ٹھنڈا رکھنے کے لیے ملک چلر استعمال کیا جاتا ہے۔ اس پورے عمل کے لیے درکار بجلی اب شمسی توانائی سے حاصل ہوتی ہے۔
اس وجہ سے بجلی کا بل نہیں آتا اور دیہی علاقوں میں لوڈشیڈنگ کا مسئلہ بھی درپیش نہیں ہوتا۔
صرف جناتائی ہی نہیں بلکہ دھاراشیو اور لاتور اضلاع کے تقریباً 100 دیہات میں خواتین کسان شمسی توانائی سے چلنے والی دودھ کی ڈیریاں چلا رہی ہیں۔ یہ خواتین معاشی طور پر خود مختار ہو رہی ہیں اور ان کی زندگیوں میں کچھ اہم تبدیلیاں بھی نظر آ رہی ہیں۔
دودھ ایک جلد خراب ہونے والی شے ہے۔گائے اور بھینس کا دودھ دوہنے کے بعد اسے بروقت ٹھنڈا کرنا ضروری ہوتا ہے۔
اگر نقل و حمل میں تاخیر ہو جائے یا بجلی کی فراہمی منقطع ہو جائے تو دودھ کے معیار میں کمی اور مالی نقصان کا خطرہ ہوتا ہے۔ اس لیے گاؤں ہی میں دودھ کو ٹھنڈا رکھنے کا انتظام کسانوں کے لیے اہم ہوتا ہے۔
جناتائی کہتی ہیں: ’سولر ملک چلر کا یونٹ خودکار طریقے سے چلتا ہے۔ کولنگ ہوتی ہے اور پانی نیچے گرتا ہے، جس سے دودھ ٹھنڈا ہو جاتا ہے۔ اگر کبھی دودھ لے جانے والی گاڑی کو تاخیر ہو جائے تو دودھ چلر میں رکھنا پڑتا ہے۔ اسی لیے سولر کی ضرورت ہوتی ہے۔‘
گنے کاٹنے والی مزدور سے ڈیری فارم کی مالکن تک
کم عمری میں شادی ہونے کے بعد جناتائی گنا کاٹنے والی مزدور کے طور پر کام کرتی تھیں۔ بعد ازاں انھوں نے کھیتی باڑی شروع کی۔ لیکن انھیں احساس ہوا کہ صرف زراعت کے ذریعے گھر کا خرچ نہیں چل سکتا۔
اس کے بعد وہ سویم شکشن پریوگ (ایس ایس پی) نامی ادارے سے منسلک ہو گئیں۔
ایس ایس پی نے کارپوریٹ سوشل رسپانسبلٹ (سی ایس آر) کے ذریعے دھاراشیو اور لاتور اضلاع میں شمسی توانائی سے چلنے والی دودھ ڈیریوں کا منصوبہ شروع کیا ہے۔ جناتائی انھی میں سے ایک ڈیری چلاتی ہیں۔
اس کے علاوہ انھیں پرومتھیئن پاور سسٹمز پرائیویٹ لمیٹڈ کی جانب سے تکنیکی معاونت بھی حاصل ہے۔ ایسی 100 خواتین ڈیری فارمز کے ذریعے مرہٹواڑہ میں خود آمدنی حاصل کر رہی ہیں۔
اس سے ان میں گھر کے اخراجات اور بچوں کی تعلیم کے لیے رقم جمع کرنے کی صلاحیت پیدا ہوئی ہے۔
اس منصوبے کی خاص بات صرف یہ نہیں کہ ڈیری خواتین چلاتی ہیں۔ بلکہ ڈیری میں دودھ فراہم کرنے والے کسانوں کے گھر کی خاتون کے بینک اکاؤنٹ میں دودھ کی رقم جمع کی جاتی ہے۔
دودھ کلیکشن سینٹر میں دودھ لانے کے بعد اس کا وزن اور چکنائی چیک کی جاتی ہے۔ اسی بنیاد پر دودھ کی قیمت مقرر ہوتی ہے۔ اس لین دین کی معلومات خواتین کو ان کے موبائل فون پر ایس ایم ایس کے ذریعے موصول ہوتی ہیں جبکہ ہر ماہ دودھ کی رقم براہ راست ان کے اکاؤنٹس میں جمع کی جاتی ہے۔
جناتائی کہتی ہیں: ’ہم خواتین کو بلا کر ان کے نام سے اکاؤنٹ کھلواتے ہیں۔ انھی کے اکاؤنٹ میں رقم جمع ہوتی ہے۔ پہلے پیسے مردوں کے ہاتھ میں جاتے تھے۔ اب مردوں سے یہ پوچھنے کی ضرورت نہیں کہ میں فلاں چیز خریدوں یا نہیں۔ آپ خود جا کر کام کر سکتی ہیں۔ میں خود اپنی رقم کی مالک ہوں۔‘
خواتین کے ہاتھ میں پیسہ آنے سے کیا بدلا ہے؟
سویم شکشن پریوگ ادارے کے مطابق خواتین کے ہاتھ میں براہ راست رقم آنے سے خاندان کے مالی فیصلوں میں ان کی شمولیت بڑھی ہے۔
اس سے پہلے جانوروں کی دیکھ بھال سے لے کر دودھ دوہنے تک زیادہ تر کام خواتین کرتی تھیں۔
تاہم دودھ کی فروخت سے حاصل ہونے والی رقم پر ان کا براہ راست اختیار نہیں تھا۔
ایس ایس پی کی چیف ایگزیکٹو آفیسر نسیم شیخ نے بتایا: ’لیکن ہمارے قائم کردہ نظام کی وجہ سے خواتین کی محنت کا معاوضہ براہ راست ان کے بینک اکاؤنٹس میں جمع ہو رہا ہے۔‘
سویم شکشن پریوگ (ایس ایس پی) یہ منصوبہ مقامی کسان پروڈیوسر کمپنیوں کے ذریعے چلا رہا ہے۔ ادارے کے مطابق تقریباً تین ہزار خواتین اس منصوبے سے مستفید ہو رہی ہیں۔
ہر مرکز میں تقریباً تین کلوواٹ صلاحیت کے سولر پینل نصب ہیں اور ان میں دن بھر میں 250 لیٹر دودھ ذخیرہ کرنے کی گنجائش ہے۔
دھاراشیو اور لاتور کی 100 خواتین کی دودھ کی ڈیریوں سے روزانہ اوسطاً 10 ہزار لیٹر دودھ جمع کیا جاتا ہے۔
ان مراکز سے روزانہ اوسطاً 10 ہزار لیٹر دودھ جمع کیا جاتا ہے۔اس ادارے کی فیلڈ آفیسر اور منجیری سکھی فارمر پروڈیوسر کمپنی کی ڈائریکٹر دیپالی تھوڈسرے کے مطابق ہر مرکز ایک خاتون یا خواتین کے گروپ کے ذریعے چلایا جاتا ہے۔ اس نظام کے فائدے کے بارے میں پوچھے جانے پر تھوڈسرے نے کہا: سولر ملک چلر کی وجہ سے خواتین صبح اور شام کا دودھ بجلی پر کوئی خرچہ کیے بغیر ایک ہی جگہ ٹھنڈا کر کے محفوظ کر سکتی ہیں۔
اس لیے دودھ لے جانے کے لیے روزانہ دو مرتبہ گاڑی بھیجنے کی ضرورت کم ہو جاتی ہے۔ دودھ خراب ہونے کا خطرہ کم ہوتا ہے اور نقل و حمل کے اخراجات بھی بچتے ہیں۔
’پیسہ اور اعتماد دونوں بڑھنے لگے‘
ایس ایس پی نے سی ایس آر کے ذریعے اس منصوبے کے آغاز میں دودھ ٹھنڈا کرنے والی مشینیں اور دیگر آلات خواتین کو فراہم کیے تھے۔ لیکن چونکہ ابتدائی مشینیں بجلی سے چلتی تھیں، اس لیے بجلی کا خرچہ کاروبار کے لیے مسئلہ بن گیا تھا۔
دیپالی تھوڈسرے نے بتایا کہ ابتدا میں خواتین کو چلنگ یونٹ اور فیٹ جانچنے کی مشینیں، اور دودھ کے کین فراہم کیے جاتے تھے۔ تاہم ان آلات کی وجہ سے ہر ماہ تقریباً 1500 سے 1800 روپے تک بجلی کا بل آتا تھا۔ اس لیے خواتین کے پاس کاروبار سے مطلوبہ مالی فائدہ باقی نہیں رہتا تھا۔
بعد ازاں سویم شکشن پریوگ ادارے نے سی ایس آر کے ذریعے ڈیری چلانے کے لیے درکار شمسی توانائی کا نظام خواتین کو مفت فراہم کیا۔ اس کے نتیجے میں بجلی کے بل پر خرچ ہونے والی رقم بچنے لگی۔
دوسری جانب، بجلی کی فراہمی منقطع ہونے کی صورت میں دودھ کو فوری طور پر ضلعی سطح کے مرکز تک پہنچانے کی ضرورت بھی کم ہو گئی، جیسا کہ دیپالی نے بی بی سی مراٹھی کو بتایا۔
اس کاروبار سے جناتائی کو صرف مالی آمدنی ہی حاصل نہیں ہوئی بلکہ اپنے بارے میں ان کا نقطۂ نظر بھی بدل گیا۔
وہ کہتی ہیں: ’پہلے مجھے کچھ سمجھ نہیں آتی تھی۔ لوگوں کی باتیں برداشت کرتی تھی۔ لوگ جو کام کہتے وہی کرتی تھی۔ لیکن ایس ایس پی میں آنے کے بعد مختلف تجربہ ہوا۔ لوگوں کے لیے مزدوری کرنا بند کر دیا۔ اب اپنے لیے کام کرنے کا فیصلہ کیا ہے۔‘
سویم شکشن پریوگ ایک ایسا ادارہ ہے جو خواتین کی کاروباری صلاحیت، صاف توانائی اور موسمیاتی تبدیلی سے ہم آہنگ زراعت پر کام کرتا ہے۔
ادارہ صرف کاروبار شروع کروانے پر توجہ نہیں دیتا بلکہ کاروباری نظم و نسق، منڈی سے روابط اور مالی معاملات کی تربیت بھی فراہم کرتا ہے۔
خشک سالی میں دودھ کا کاروبار کیسے چلے گا؟
اس علاقے میں کبھی سیلاب جیسی اور کبھی بارش کی کمی سے پیدا ہونے والی خشک سالی کی صورتحال بار بار پیدا ہوتی ہے۔
اس سال نہ صرف مرہٹواڑہ بلکہ مہاراشٹر اور پورا انڈیا ایل نینو کے اثرات سے متاثر ہوا ہے۔ اسی وجہ سے ریاست کے بیشتر اضلاع میں خشک سالی کا اعلان کیا گیا ہے۔
ایسی صورتحال میں کسانوں کو مویشی فروخت کرنے سے لے کر زرعی آمدنی میں کمی تک متعدد مشکلات کا سامنا کرنا پڑتا ہے۔ دودھ ڈیری زرعی آمدنی کے ساتھ ایک اہم اضافی ذریعہ معاش ثابت ہوتی ہے۔ لیکن جانوروں کے لیے چارے اور پانی کی دستیابی بھی اتنی ہی اہم ہے۔
اس سال پانی کی قلت کے باعث چارے کی قیمتوں میں اضافہ ہوا ہے۔
اسی لیے کسانوں کا کہنا ہے کہ دودھ کی پیداوار کی لاگت بھی بڑھ گئی ہے۔
ماہرین کے مطابق گرمیوں میں شدید درجہ حرارت جانوروں کی صحت اور دودھ کی پیداوار کو متاثر کر سکتا ہے۔
اس کے علاوہ دودھ کی قیمتوں میں اتار چڑھاؤ، جانوروں کے علاج معالجے کے اخراجات، دودھ کے معیار کو برقرار رکھنا اور مشینری کی دیکھ بھال جیسے چیلنجز بھی موجود ہیں۔
اس لیے یہ تحقیق بھی ضروری ہے کہ اس کاروبار سے خواتین کے پاس حقیقی معنوں میں کتنا خالص منافع باقی رہتا ہے۔
اگرچہ شمسی توانائی دستیاب ہو گئی ہے، تاہم سولر پینلز، انورٹرز اور ملک چلرز کی باقاعدہ دیکھ بھال اور مرمت کے لیے مقامی سطح پر تربیت یافتہ افرادی قوت کی ضرورت ہے۔
شمسی توانائی کی وجہ سے بجلی کے اخراجات اور بجلی کی فراہمی پر انحصار کم ہوا ہے۔
لیکن پانی کی قلت، چارے کی بڑھتی لاگت اور موسمی حالات کی غیر یقینی صورتحال اب بھی اہم چیلنجز ہیں۔
BBC World Service کی نئی ایپ ڈاؤن لوڈ کریں۔
'BBC News اردو' ایڈیشن کا انتخاب کریں اور نیوز الرٹس، تحقیقاتی اور تفصیلی رپورٹس، سب کچھ ایک ہی جگہ پر حاصل کریں۔
نوٹ: نئی ایپ برطانیہ اور امریکہ میں دستیاب نہیں ہے اور اس کا انگریزی زبان میں ایڈیشن موجود نہیں۔
