مایہ ناز اداکار ہمایوں سعید نے اہم اعلان کرتے ہوئے کہا کہ وہ معروف ترین ڈرامہ سیریل ’میرے پاس تم ہو‘ میں ان کے بیٹے رومی کا کردار ادا کرنے والے شیث گل کے ساتھ ایک بار پھر آن اسکرین نظر آئیں گے۔
ہدایت کار و مصنف خلیل الرحمان قمر کے ڈرامے’’میرے پاس تم ہو‘‘ نے اپنے کرداروں اور عمدہ ڈائیلاگ کے باعث پاکستان سمیت دنیا بھر میں مقبولیت حاصل کی۔ ڈرامے میں کام کرنے والے سب ہی فنکاروں نے اپنا اپنا کردار بخوبی انجام دیا جس کی مداحوں نے خوب تعریف بھی کی لیکن سیریل میں سب سے زیادہ جس کردار کو سراہا گیا وہ ہمایوں سعید کے بیٹے کا کردار نبھانے والے ’شیث گل‘ تھے جس کا نام ڈرامے میں رومی تھا۔ رومی اپنی اداکاری اور ڈائیلاگ کی بہترین ادائیگی کے باعث مداحوں کی توجہ کا مرکز بنا تھا۔
بے حد مقبولیت کے بعد اب ڈرامے کے ہیرو اداکار ہمایوں سعید نے سوشل میڈیا سائٹ انسٹاگرام پوسٹ پر اشارہ دیتے ہوئے کہا کہ وہ شیث گل کے ہمراہ ایک بارپھر اداکاری کرتے نظر آئیں گے تاہم اس بار وہ ڈرامہ نہیں بلکہ فلم ہوگی۔ اداکار نے کہا کہ وہ شیث کے ساتھ انشا اللہ جلد ہی بڑے پردے پر جلوہ گر ہونگے۔
تاہم ہمایوں کے ساتھ اس بار کونسی اداکارہ جلوہ گر ہونگی اس حوالے سے انہوں نے اب تک کچھ نہیں بتایا۔
واضح رہے کہ ڈرامہ میرے پاس تم ہو میں ہمایوں اور عائزہ خان کی جوڑی کو مداحوں نے بہت پسند کیا تھا۔