مشہور ترین ڈرامہ سیریل ’الف‘ میں حسنِ جہاں کا کردار نبھانے والی اداکارہ کبریٰ خان نے اپنی انسٹاگرام پوسٹ کے ذریعے بتایا کہ کیسے حسنِ جہاں کے کردار نے ان کی زندگی کو بدل ڈالا۔
حال ہی میں کبریٰ خان نے سوشل میڈیا سائٹ انسٹاگرام پر اپنی ایک تصویر شیئر کرنے کے ساتھ ساتھ ایک طویل کیپشن لکھتے ہوئے اپنے کردار کے حوالے سے سب کو آگاہ کیا۔
انہوں نے اپنی پوسٹ کے آغاز میں لکھا کہ میں نے حسنِ جہاں کے کردار میں اداکاری نہیں کی بلکہ میں اس کردار میں رہتی تھی۔
اداکارہ نے پوسٹ میں لکھا کہ ہر فنکار کی زندگی میں کم از کم ایک بار ایسا وقت ضرور آتا ہے اور وہ ایک کردار یا اسکرپٹ ہوتا ہے، جو اس کی زندگی کو بدل دیتا ہے، حسنِ جہاں کا کردار ادا کرنا میرے لیے ایسا لمحہ تھا جس نے مجھ پر گہرا اثر کیا۔
کبریٰ خان نے حسنِ جہاں کے کردار پر روشنی ڈالتے ہوئے کہا کہ اس کردار نے مجھے حوصلے کا سبق دیا کہ کس طرح ایمان، صبر، لچکداری اور بے لوثی کی جانب گامزن ہوتے ہیں۔
اداکارہ نے اپنی پوسٹ کے ذریعے مزید بتایا کہ یہ کردار ہمیشہ میرا ایک بڑا حصہ ہوگا بعد ازاں اداکارہ نے اس سفر کے لیے اللہ کا بہت شکر ادا کیا۔