دو دِن قبل کراچی کے رہائشی یحییٰ جعفری میں کورونا وائرس کی تشخیص ہوئی جس کے بعد شہر کے مختلف اسپتالوں میں ایمرجنسی نافذ کر دی گئی۔
تفصیلات کے مطابق وائرس سے متاثرہ مریض یحییٰ جعفری کا آڈیو پیغام سامنے آگیا ہے۔
پیغام میں یحییٰ نے کہا کہ 'ہاں وائرس ہوا ہے لیکن ڈاکٹرز کا کہنا ہے کہ اس وائرس نے مجھے زیادہ متاثر نہیں کیا، ابھی اس مرض کی ابتدا ہے۔ اس وائرس سے متاثر افراد میں اموات کی شرح دنیا بھر میں صرف ایک فیصد ہے جبکہ جو لوگ اس وائرل سے جاں بحق ہوئے ان کی عمر ساٹھ سال سے زائد تھی'۔
یحییٰ نے کہا کہ 'نوجوانوں کا ایمیون سسٹم مضبوط ہوتا ہے اس لئے وہ اس بیماری کا مقابلہ کر لیتے ہیں، باقی مجھے آپ سب کی دعاؤں کی ضرورت ہے'۔
اپنے پیغام میں یحییٰ نے اس شخص کو جس کے نام آڈیو پیغام بھیجا گیا ہے، اس سے درخواست کی ہے کہ 'آپ خصوصی طور پر اپنا ٹیسٹ کروا لیں کیونکہ آپ اور میں ساتھ ساتھ ایک ہی کمرے میں ہوتے تھے لہذا آپ بھی اپنا ٹیسٹ کروائیں'۔