کورونا وائرس سے بچاؤ کے لیے پاکستان سپر لیگ کے میچز کے دوران نیشنل اسٹیڈیم کراچی میں آنے والے تمام شائقین کے لئے خصوصی اسکریننگ کرنے کا فیصلہ کیا گیا ہے۔
ذرائع کے مطابق پی ایس ایل میچز کے دوران کورونا وائرس سے بچاؤ کے لیے احتیاطی تدابیر کے طور پر نیشنل اسٹیڈیم میں سینیٹائزر لگانے کا فیصلہ کیا گیا ، جبکہ سندھ حکومت کی جانب سے اسٹیڈیم میں مفت سینیٹائزر کے اسٹالز بھی نصب کئے جائیں گے، ساتھ ہی پارکنگ کی جگہوں پر بھی سینیٹائزر کے اسٹالز لگیں گے۔
سندھ حکومت کا کہنا ہے کہ کورونا وائرس کا کوئی خوف نہیں ہے، اس حوالے سے طبی ماہرین نے بھی کلیئرنس دی ہے تاہم اسٹیڈیم کے تمام داخلی راستوں پر اسکریننگ کے لیے خاص قسم کے کاؤنٹر لگائیں جائیں گے جب کہ دروازوں پر پولیس کے ساتھ میڈیکل کا عملہ بھی تعینات کیا جائے گا۔