بڑی عمر کے افراد کے مقابلے میں بچوں میں کورونا وائرس کی علامات کی شدت بہت کم ہوتی ہے جبکہ بچوں میں کیسز کی تشخیص بھی مشکل سے ہوتی ہے۔ یہ بات چین میں ہونے والی ایک نئی تحقیق میں سامنے آئی ہے۔
تفصیلات کے مطابق چین کے مشرقی صوبے زیجیانگ میں بچوں کے 36 کیسز پر ہونے والی تحقیق میں دریافت کیا گیا کہ 10 کیسز میں کسی قسم کی علامات ظاہر نہیں ہوئیں، جبکہ 7 میں تنفس کی علامات معتدل تھی۔ اس تحقیق کے نتائج جریدے دی لانسیٹ انفیکشیز میں شائع ہوئے۔
زیجیانگ میں ہونے والی نئی تحقیق میں شامل سائنسدانوں کا کہنا ہے کہ بچوں میں اتنی بڑی تعداد میں علامات ظاہر نہ ہونے سے عندیہ ملتا ہے کہ ان میں مرض کی تشخیص آسان نہیں، جو کہ خطرناک صورتحال کا باعث بھی بن سکتا ہے کیونکہ وہ وائرس آگے پھیلا سکتے ہیں۔