انڈیا کے شہر بھوپال میں ایک عمر رسیدہ شخص کی آخری رسومات میں شریک رشتے دار اس وقت پریشانی میں مبتلا ہوئے جب انہیں علم ہوا کہ مرحوم بزرگ کا کورونا وائرس ٹیسٹ مثبت نکل آیا۔
بھارتی میڈیا کے مطابق ریاست مدھیہ پردیش کے دارالحکومت بھوپال میں مہلک کورونا وائرس کے مریض جگن ناتھ میتھل کی آخری رسومات میں کئی افراد شریک تھے۔
جگن ناتھ کی موت کے 3 دن بعد رپورٹ سامنے آئی جس میں اس شخص کا کورونا وائرس پازیٹو نکلا۔
بھارتی میڈیا کا کہنا ہے کہ بزرگ شخص بھوپال کے حمیدیا اسپتال میں زیرِ علاج تھا اور اب اسپتال کا عملہ بھی تشویش میں مبتلا ہوگیا ہے کیونکہ مریض کو بغیر کسی احتیاطی تدابیر کے عام مریضوں کی طرح رکھا گیا تھا۔
بھوپال شہر میں کورونا وائرس سے یہ دوسری موت واقع ہوئی ہے، اس سے قبل پہلی موت بھی 6 اپریل کو حمیدیا اسپتال میں ہی ہوئی تھی۔