امریکہ کی ایک خاتون کے گھر بچے کی پیدائش ہوئی لیکن حیران کن بات یہ ہے کہ بچہ کی پیدائش اس وقت ہوئی جب خاتون کوما میں تھیں۔
تفصیلات کے مطابق حاملہ خاتون کو اسپتال میں کورونا وائرس کا ٹیسٹ مثبت آنے کے بعد داخل کیا گیا تھا جس کے بعد دوران علاج وہ کوما میں چلی گئیں۔
برطانوی اخبار دی انڈیپینڈنٹ نے اپنی رپورٹ میں امریکی نشریاتی ادارے کی خبر کا حوالہ دیتے ہوئے بتایا ہے کہ امریکی ریاست واشنگٹن کے شہر وینکوور کی خاتون نے کوما کے دوران بچے کو جنم دیا۔
رپورٹ کے مطابق کوما میں جانے والی خاتون بچے کو جنم دینے کے 5 دن بعد ہوش میں آگئیں اور انہوں نے ایک ٹی وی پروگرام میں آن لائن شرکت کی، جہاں انہوں نے اس تجربے کو دنیا بھر کے لوگوں سے شئیر کیا۔
خاتون کے مطابق 'مارچ کے اختتام میں ان کی طبعیت خراب ہوگئی تو انہیں اسپتال لے جایاگیا۔ جہاں ان کا کورونا کا ٹیسٹ مثبت آیا، اس کے بعد انہیں علاج کے لیے اسپتال میں داخل کر لیا گیا'۔
خاتون کا کہنا تھا کہ 'وہ بالکل صحت مند تھیں اور ان کے کسی بھی رشتہ دار کو ان کے یوں اچانک بیمار ہونے اور پھر کوما میں چلے جانے کی امید نہ تھی، کوما میں مبتلا ہونے کے وقت وہ حمل کے 33 ویں ہفتے میں تھیں'۔
رپورٹ کے مطابق خاتون کو 30 مارچ کو ہسپتال میں داخل کیا گیا اور اگلے ہی دن وہ کوما میں چلی گئیں جب کہ یکم اپریل کو کوما کی حالت میں ان کےہاں بچے کی پیدائش ہوئی۔
تاہم بچے کی پیدائش کے 5 دن بعد 6 اپریل کو خاتون کوما سے باہر آئیں، اور یہ جان کر بے حد خوش ہوئیں کہ انہوں نے ایک بچے کو جنم دیا ہے، جبکہ خاتون کے اہلخانہ اسے معجزہ قرار دے رہے ہیں۔