کورونا وائرس کے پھیلاؤ کے خطرے کے سبب دنیا بھر کے کئی ممالک میں لاک ڈاؤن کیا گیا تھا جبکہ اب خبر یہ سامنے آ رہی ہے کہ چند ممالک نے لاک ڈاؤن میں نرمی کا عندیہ دے دیا ہے۔
جنیوا میں عالمی ادارہ صحت کے ہیڈکوارٹر میں صحافیوں سے گفتگو کے دوران ڈبلیو ایچ او کے چیف کا کہنا تھا کہ کورونا وائرس ایک سانحہ ہے، یہ ایک ایسا وائرس ہے جسے بہت سارے لوگ ابھی تک سمجھ نہیں سکے۔
انہوں نے خبردار کیا ہے کہ کورونا وائرس سے متعلق برا وقت ابھی آئے گا کیوں کہ کئی ممالک کی جانب سے لاک ڈاؤن کی پابندیوں میں نرمی کی جا چکی ہے۔
امریکی صدر کی جانب سے عالمی ادارہ صحت پر کورونا سے متعلق کی گئی تنقید پر انہوں نے کہا کہ ڈبلیو ایچ او میں کوئی چیز پوشیدہ یا راز نہیں، یہ صحت کا مسئلہ ہے، چیزوں کو خفیہ رکھنا یا چھپانا مشکلات پیدا کرتا ہے۔
ان کا مزید کہنا تھا کہ کورونا وائرس بہت ہی خطرناک ہے، لوگوں کی پہلی اور سب سے بڑی دشمن بیماری ہے، ہم سب کو کورونا وائرس سے ڈٹ کر مقابلہ کرنا چاہیے۔