جہاں دنیا بھر میں وبائی مرض کورونا وائرس کے علاج کے لئے ویکسین تیار کرنے کی سر توڑ کوششیں جاری ہیں تو وہیں وسطی افریقہ کے ملک مڈغاسکر نے ایک ایسی چائے بنانے کا دعویٰ کیا ہے جسے پینے سے کورونا وائرس سے متاثرہ مریض سات دنوں میں صحتیاب ہو جائیں گے۔
چائے کا نام کووڈ آرگینکس رکھا گیا ہے اور یہ چائے آرتیمیزیا نامی پودے سے بنائی گئی ہے جو ملیریا کے علاج کے لئے کارآمد ثابت ہوئی ہے۔
اس چائے کا فارمولا مڈغاسکر انسٹیٹیوٹ آف اپلائڈ ریسرچ میں تیار کیا گیا لیکن اسے فی الحال عالمی سطح پر ٹیسٹنگ کے لئے نہیں بھیجا گیا۔
مڈغاسکر کے صدر اینڈری واجولینا نے عوام کی یقین دہانی کراتے ہوئے کہا کہ یہ چائے پینے سے کسی کو کوئی نقصان نہیں پہنچے گا اور انہوں نے یہ چائے خود بھی پی تھی۔
انہوں نے مزید دعویٰ کیا ہے کہ کورونا وبا کے دو متاثرین اس چائے کو پینے سے شفایاب ہوگئے۔
مڈغاسکر کی دو کروڑ سے زائد آبادی ہے اور حیران کن بات یہ بھی ہے کہ وہاں اس وائرس سے بہت کم لوگ متاثر ہوئے جبکہ سرکاری اعداد و شمار کے مطابق کسی کی اموات سامنے نہیں آئی ہے۔
البتہ عالمی ادارہ صحت کے مطابق کورونا کے خلاف مڈغاسکر کی چائے کا کوئی سائنسی ثبوت موجود نہیں۔