فرانسیسی دوا ساز کمپنی سنوفی کورونا وائرس کی ویکسین تیار کرنے میں مصروف ہے جبکہ کمپنی کے سربراہ کی جانب سے ایک بیان کے بعد نئی بحث شروع ہو گئی ہے کہ اگر ویکسین تیار ہو بھی گئی تو وہ سب سے پہلے کس ملک کو ملے گی؟
کمپنی کے سربراہ پال ہڈسن نے گزشتہ دنوں بلوم برگ کو ایک انٹرویو دیا تھا جس میں ان کا کہنا تھا کہ کورونا وائرس کی کامیاب ویکسین کی تیاری کی صورت میں سارے ابتدائی آرڈرز امریکہ کو فراہم کیے جائیں گے کیونکہ سب سے پہلے اسی نے کمپنی کو ویکسین کی تیاری کے لیے فنڈنگ کی۔
مذکورہ بیان کے بعد فرانس کے وزیراعظم نے کہا کہ کسی بھی کامیاب ویکسین کو برابری کی بنیاد پر ہی تقسیم کیا جائے گا اور اس حوالے سے بحث کی گنجائش موجود نہیں ہے۔
ماہرین کے مطابق ویکسین کی تقسیم دنیا میں قائم غیرمنصفانہ نظام کا پردہ فاش کرے گی۔