سوشل میڈیا پر پاکستانی اداکارہ عظمیٰ خان پر تشدد کے حوالے سے ایک طوفان کھڑا ہوگیا ہے جس کے نتیجے میں لاہور کے تھانہ ڈیفنس میں مقدمہ تو درج ہوگیا ہے، لیکن اس میں دی جانے والی تفصیلات سے ایک اہم سوال جنم لے رہا ہے کہ شکایت کندہ نے واقعے کے دو دن بعد معاملے کو کیوں اٹھایا؟
اداکارہ عظمیٰ خان کی جانب سے درج کروائی گئی ایف آئی آر میں لکھا ہے کہ چاند رات کو دو خواتین ان کے گھر میں آئیں اور تشدد شروع کردیا۔
اس حوالے سے نہ تو پولیس رپورٹ میں اور نہ عظمیٰ نے خود اس کی کوئی وجہ بیان کی تاہم ایک ویڈیو میں انہوں نے اس بات کا اعتراف کیا کہ انہیں دو دن سے معاملہ دبانے کے لئے رقوم کی آفر کی جا رہی تھی۔
پریس کانفرنس میں اداکارہ کا کہنا تھا کہ عثمان میرے ساتھ نکاح کرنا چاہتا تھا اور اس کے ساتھ تعلق 2 سال سے تھا۔ بات کرتے ہوئے انہوں نے بتایا ہے کہ میں نے 5 مہینے پہلے عثمان سے شادی کرنے سے انکار کر دیا تھا جس کے بعد وہ پرانے تعلق کی بنیاد پر ملاقات کیا کرتا تھا۔