کراچی میں پولیس نے ایک ٹک ٹاک اسٹوڈیو کو سیل کر دیا ہے، جس کا سٹرکچر ایک پولیس اسٹیشن کی طرح بنایا گیا تھا۔
گلستان جوہر کے علاقے پہلوان گوٹھ کے ایک رہائشی اپارٹمنٹ میں موجود فلیٹ میں پولیس کی جانب سے گذشتہ روز چھاپہ مارا گیا۔
ڈی ایس پی شاہراہ فیصل اقبال شیخ کے مطابق اس جعلی تھانے میں لاک اپ بھی بنا ہوا تھا اور ایک کمرہ بلکل ایس ایچ او کے دفتر جیسا رکھا گیا تھا، جس میں میز پر ہرے رنگ کی چادر بچھی ہوئی تھی ساتھ ہی ٹیلیفون ہینڈ سیٹ، بانی پاکستان کی تصویر اور دیواروں پر سندھ پولیس کا مونو گرام بھی بنا ہوا تھا جوکہ ایک تھانے کا حقیقی منظر پیش کر رہا تھا۔
انھوں نے مذید بتایا کہ مقامی لوگوں نے انھیں اطلاع دی تھی کہ یہاں ایک اسٹوڈیو تھانہ بنایا گیا ہے جس پر پولیس نے چھاپہ مارا تاہم کوئی گرفتاری عمل میں نہیں آئی۔
اقبال شیخ کا کہنا ہے کہ ان کے پاس ایک ایسی ٹک ٹاک ویڈیو بھی موجود ہے جس میں ایس ایچ او اور اے ایس آئی کی وردی میں ملبوث نوجوانوں نے شوٹنگ کی ہے، مگر تاحال ان کو گرفتار نہیں کیا جاسکا ہے۔