عالمگیر وبا کورونا وائرس پر قابو اور اس کا علاج دریافت کرنے کے لئے دنیا بھر کے سائنسدان دن رات ایک کئے ہوئے ہیں اور اب انہیں کووڈ 19 وائرس کو شکست دینے کے لئے ایک انتہائی مؤثر ہتھیار مل گیا ہے۔
میل آن لائن کے مطابق یہ ہتھیار جوڑوں کی سوزش کے علاج کے لئے استعمال کی جانےوالے دوا ٹوسیلیزومیب (Tocilizumab) ہے، جس کے متعلق سائنسدانوں کا کہنا ہے کہ یہ کووڈ 19 وائرس سے انسانی مدافعتی نظام کو نقصان پہنچانے سے روک سکتی ہے ۔
رپورٹ کے مطابق جب کوئی شخص کورونا وائرس کا شکار ہوتا ہے تو اس کا مدافعتی نظام حد سے زیادہ متحرک ہو جاتا ہے۔ اس صورتحال کو مدد نظر رکھتے ہوئے سائنسدانوں نے مدافعتی نظام میں طوفان ‘ (immune system storm) کا نام دے رکھا ہے۔
سائنسدانوں کا کہنا ہے کہ جوڑوں کی سوزش کی دوا انفلیمیشن کو کم یا ختم کرتی ہے اور کورونا وائرس کے باعث امیون سسٹم میں آنے والے طوفان کا سبب بھی انفلیمیشن ہی ہوتی ہے، چنانچہ جوڑوں کی سوزش کی دوا اس پر بہت معاون ثابت ہو سکتی ہے۔
رپورٹ کے مطابق اس دوا کے تجربات کئی ممالک میں بیک وقت کئے جا رہے ہیں اور رواں ہفتے ان تجربات کے نتائج آنا متوقع ہیں۔ سائنسدانوں کے مطابق ٹرائلز میں دنیا بھر کے 60 اسپتالوں میں 450 کووڈ 19 کے مریض شامل ہیں۔
اگر یہ تجربات کامیاب ہوئے تو یہ دوسری دوا ہوگی جو کورونا وائرس کے خلاف بہتر ثابت ہو گی اور اس وبا سے ہلاکتوں کی تعداد میں کمی آسکے گی۔
واضح رہے کہ دنیا بھر میں کورونا وائرس کے انفیکشن سے متاثرہ افراد کی تعداد ایک کروڑ 67 لاکھ 60 ہزار 360 ہوگئی، جبکہ 6 لاکھ 59 410 افراد اس وبا کی وجہ سے لقمہ اجل بن چکے ہیں۔