کورونا وائرس کے حوالے سے اب نئی تحقیق سامنے آئی ہے جس میں ماہرین نے کورونا وائرس کے بغیر علامات والے مریضوں کے حوالے سے کچھ انکشافات کیے ہیں۔
ماہرین کے مطابق کورونا وائرس کے ایسے مریض جن میں علامات ظاہر نہیں ہوتیں، اس وائرس کو اتنا زیادہ آگے پھیلا سکتے ہیں جتنا علامات والے مریض۔
جنوبی کوریا میں ہونے والی اس تحقیق میں زیادہ ٹھوس ثبوت پیش کیے گئے کہ بغیر علامات والے مریضوں کی ناک، حلق اور پھیپھڑوں میں اتنا ہی وائرل لوڈ ہوتا ہے جتنا علامات والے مریضوں میں اور دونوں میں اس کا دورانیہ بھی لگ بھگ ایک جتنا ہی ہوتا ہے۔
اس نئی تحقیق میں مریضوں میں جینیاتی مواد کو پرکھا گیا اور محققین کی جانب سے وائرس کی منتقلی کی چین یا زندہ وائرسز کی نشوونما کو نہیں دیکھا گیا۔ ماہرین کا کہنا ہے کہ نتائج سے ٹھوس عندیہ ملتا ہے کہ بغیر علامات والے مریض غیر دانستہ طور پر وائرس کو پھیلادیتے ہیں۔
ماہرین کا اس حوالے سے مزید کہنا تھا کہ کورونا وائرس کے متعدد مریض مکمل طور پر علامات سے محفوظ نہیں ہوتے، مگر ان میں بیماری کی شدت بہت کم ہوتی ہے، ایسے افراد کے لیے تحقیقی رپورٹس میں اسمپٹومیٹک کی اصطلاح استعمال ہوئی ہے، مگر یہ درست نہیں ہے، کیونکہ ایسے افراد تھوڑی بہت تو بیماری محسوس کرتے ہیں مگر اتنے بیمار نہیں ہوتے کہ وائرس کی موجودگی کا یقین کرسکیں۔
واضح رہے مذکورہ تحقیق طبی جریدے جاما انٹرنل میڈیسین میں شائع کی گئی۔