لیاقت علی خان پاکستان کے عظیم رہنما رہ چکے ہیں، آپ پاکستان کے پہلے وزیرِاعظم تھے۔ ہمارے ملک کی آزادی میں آپ کا نمایاں کردار رہا ہے۔
لیکن کیا آپ جانتے ہیں کہ لیاقت علی خان کے پوتے ایک اداکار اور گلوکار ہیں، اور آج کل ایک مشہور ڈرامے میں اداکاری کے جوہر دکھا رہے ہیں؟
نجی ٹی وی چینل سے نشر ہونے والا معروف ڈرامہ 'ثبات' میں 'مسٹر فرید' کا کردار کرنے والے اداکار 'معظم علی خان' پاکستان کے عظیم رہنما لیاقت علی خان کے پوتے ہیں۔
جی ہاں! معظم علی خان نے ڈرامہ ثبات سے ہی اداکاری کا ڈیبیو کیا ہے۔
سماجی رابطے کی ویب سائٹ فیس بک پر شوبز کے ایک پیج سے وائرل ہونے والی اس تصویر نے ہلچل مچا دی کیونکہ اس سے قبل بھی سوشل میڈیا صارفین انہیں بطور اداکار و گلوکار بہت اچھی طرح جانتے تھے لیکن یہ کوئی نہ جانتا تھا کہ ان کا تعلق کس گھرانے سے ہے۔
معظم علی سوشل میڈیا پر کافی متحرک نظر آتے ہیں، ان کی آواز انتہائی خوبصورت ہے جس کی وجہ سے یہ اپنے فیس بک اکاؤنٹ پر مختلف شاعروں کی شاعری پڑھتے ہوئے ویڈیوز اپ لوڈ کرتے ہیں۔
اداکار کا اس متعلق کہنا تھا کہ 'ان کا یہ کرنے کا صرف ایک مقصد ہے کے وہ نوجوان نسل کو اردو زبان سے محبت کرنا سکھا سکیں'۔
اداکار و گلوکار کی آواز میں شاعری سننا لوگ بے حد پسند کرتے ہیں، ان کے مداح ناصرف پاکستان میں بلکہ بھارت اور دیگر ممالک میں بھی ہیں۔