پاکستان کے ہر میچ میں اپنے جوش اور جذبے کا مظاہرہ کرنے والے چاچا کرکٹ کے انتقال کی خبریں سوشل میڈیا پر گزشتہ کچھ دنوں سے گردش کر رہی ہیں۔
لیکن آخر اس کی حقیقت کیا ہے؟
یہ خبریں بے بنیاد اور جھوٹی ہیں جس کی تصدیق خود چاچا کرکٹ نے کی ہے۔ سوشل میڈیا پر ان کی جانب سے انتقال سے متعلق پھیلائی جانے والی خبروں کو جھوٹا قرار دیتے ہوئے ویڈیو پیغام جاری کیا گیا ہے۔
انتقال دراصل پی سی بی کے سابق ہیڈ گراؤنڈ مین حاجی بشیر کا ہوا ہے، جو حرکت قلب بند ہوجانے کی وجہ سے دنیا سے رخصت ہو گئے ہیں تاہم چاچا کرکٹ سے شکل میں مماثلت کی وجہ سے سوشل میڈیا صارفین ان کو چاچا کرکٹ سمجھ بیٹھے ہیں۔
حاجی بشیر کون ہیں؟
انہوں نے 50 سال سے زائد عرصہ پاکستان کرکٹ بورڈ میں خدمات انجام دیں ، ملک میں زیادہ تر ٹیسٹ سینٹرز کی پچز حاجی بشیر نے ہی بنائیں۔
پی سی بی سے ریٹائرمنٹ کے بعد حاجی بشیر لاہور قلندرز کے ہائی پرفارمنس سینٹر میں خدمات انجام دے رہے تھے۔