معروف کمپنی مائیکرو سافٹ کے بانی بل گیٹس نے عالمی وبا کورونا وائرس کے خاتمے کے بعد کی زندگی سے متعلق مختلف پیشگوئیاں کی ہیں۔
حالیہ دنوں میں کورونا وائرس کی روک تھام کے لیے ویکسینز کے حوالے سے مثبت رپورٹس کے بعد بل گیٹس نے وبا کے بعد کی زندگی کے بارے میں اپنے خیالات کا اظہار کیا ہے۔
نیویارک ٹائمز ڈیل بک کانفرنس کے دوران ایک انٹرویو میں بل گیٹس کا کہنا تھا کہ رواں سال کورونا وائرس کی وبا کے نتیجے میں دفتری امور اور سفری تبدیلیاں وبا کے خاتمے کے بعد بھی جاری رہیں گی۔
انہوں نے کہا کہ بڑی تبدیلیوں میں سے ایک یہ ہوگی کہ کسی طرح کمپنیاں کام سے متعلق سفر کا انتظام کرتی ہیں۔
ان کا کہنا تھا کہ میری پیشگوئی ہے کہ 50 فیصد کاروباری سفر اور دفاتر کے 30 فیصد سے زیادہ دن ختم ہوجائیں گے۔
اس طرح کے کاروباری سفر کے لیے ایک سے دوسری جگہ جاکر لوگوں سے مل کر کاروباری امور طے کیے جاتے تھے اور بل گیٹس کے مطابق اب یہ سنہری اصول نہیں رہے گا۔
انہوں نے پیشگوئی کی کہ بیشتر کمپنیاں اس طرح کے کاروباری دوروں سے گریز کریں گی۔
واضح رہے کہ دنیا کے امیر ترین شخص بل گیٹس آج سے قبل بھی وبا سے متعلق پیش گوئی کرتے رہے ہیں۔ انہوں نے کورونا کی حتمی ویکسین آئندہ سال تک آنے کا امکان ظاہر کیا تھا۔