کورونا وائرس پھیلنے کی شرح میں اضافے کے خدشات کے پیشِ نظر متحدہ عرب امارات نے ایک بار پھر پاکستان سمیت دیگر 12 ممالک کے لوگوں کے لئے وزٹ اور ورک ویزا جاری کرنے پر پابندی عائد کردی ہے۔
تفصیلات کے مطابق پاکستان، افغانستان، ایران، ترکی، شام، عراق، صومالیہ، لیبیا اور کینیا سمیت دیگر ممالک پر 'یو اے ای' کی جانب سے ویزے کے اجراء پر پابندی عائد کی گئی ہے جبکہ بھارت پر اس پابندی کا اطلاق نہیں کیا گیا ۔
اماراتی سفارتخانے کے مطابق ویزے کے اجراء پر پابندی غیر معینہ مدت کے لئے لگائی گئی ہے جبکہ پہلے سے جاری شدہ ویزوں پر اس کا اطلاق نہیں ہوگا ، تاہم اس پابندی کا ختم ہونا کورونا وائرس کے پھیلاؤ میں کمی پر مبنی ہے ، امارات کے سفراتخاتے کے حکام کا مزید کہنا تھا کہ جیسے ہی کورونا کی دوسری لہر میں کمی آئے گی تو ویزے معمول کے مطابق فراہم کرنے کا سلسلہ شروع کردیا جائے گا ۔
واضح رہے کہ پاکستان سے ریڈ پاسپورٹ پر سفر کرنے والے افراد یعنی وزراء ، سفارت کار ، اور اعلیٰ سرکاری افسران کے ویزے معطل نہیں کئے گئے ہیں ایسے ویزوں پر سفاتخانے میں پروسیس جاری ہے۔